哈利卡尼入波破紀錄　為拜仁鬥皇馬造勢

周六(27日)晚德甲，拜仁慕尼黑主場以2比1擊敗法蘭克福，前鋒哈利卡尼包辦2個入波，呢位30歲英格蘭國腳今季各項賽事已有42球進帳，創下單季最多入球紀錄，包括國家隊賽事在內，職業生涯總共累積入400球，為嚟緊周三(5月1日)凌晨歐聯4強首回合主場迎戰皇馬壯行色。

拜仁慕尼黑雖然已失落聯賽錦標，兼有歐聯後顧，但哈利卡尼仍然以正選上陣，踢足全場，開賽9分鐘，佢就入波打開紀錄。雖然法蘭克福憑伊基迪基射入靚波扳平，但換邊之後，拜仁獲得12碼，由哈利卡尼主射入網鎖定2比1勝局，各項賽事4連勝。

哈利卡尼效力熱刺期間，曾於2017/18年球季上陣48場入41球，佢今季為拜仁各項賽事上陣42場入42球，刷新紀錄，當中德甲入35球，歐聯入7球。根據OPTA統計，哈利卡尼職業生涯已累積入400球，其中球會賽事入338球，為英格蘭國家隊入62球。

不過，拜仁今場贏波亦付出代價，中場干拉特賴馬傷出，可能無法出戰皇馬。