格連活特近3年首次梅開二度　曼聯肯收番佢未？

周六(27日)晚西甲，基達菲作客以3比1擊敗艾美利亞，曼聯借將格連活特繼續有出色表現，射入2球及1次助攻，亦係呢位22歲英格蘭翼鋒近3年首次梅開二度，可能會增加紅魔鬼下季收回佢自用嘅機會。

基達菲今仗反客為主，上半場27分鐘，由格連活特冷靜射入打開紀錄，雖然艾美利亞41分鐘扳平，但換邊後冇耐，格連活特又發威，把握對手門將麥斯米安奴撲出不遠，補射入網，為基達菲再次領先，亦係佢自2021年4月為曼聯上陣對般尼，射入2球之後，近3年首次梅開二度。

戰至61分鐘，格連活特橫傳畀謝美馬達射成3比1，換言之，基達菲今場3個入波都同格連活特有關，「青木」今季為基達菲各項賽事上陣31場已入10球及6次助攻。

由於「家暴事件」令曼聯對於是否收回格連活特，存在疑慮，甚至計劃出售佢，隨住佢愈戰愈勇，紅魔鬼可能會重新考慮格連活特嘅前途問題。

另外，包尾嘅艾美利亞今場輸波之後，已經提早篤定降班。