錫菲聯降班　留下一項羞恥紀錄

周六(27日)晚英超，包尾球隊錫菲聯作客以1比5慘敗於紐卡素腳下，提早前3輪成為今季第一支篤定降班。錫菲聯兩循環聯賽被紐卡素合共攻入13球，創下英超史上單季對同一支對手，最多失球紀錄。

錫菲聯繼上仗領先之下，倒輸畀曼聯之後，今仗又重蹈覆轍，開賽5分鐘由中堅艾密特賀錫頂入先開紀錄，但之後卻兵敗如山倒。紐卡素憑阿歷山大伊沙克入波扳平，下半場展開大屠殺，換邊之後，中場般奴古馬雷斯接應罰球飛頂入網，協助「喜鵲」反超前，加上阿歷山大伊沙克射入12碼，對手賓奧斯邦擺烏龍，以及後備上陣嘅哥林威爾遜建功，紐卡素反勝5比1，加上首循環大炒錫菲聯8比0，兩次交鋒合共攻入錫菲聯13球，成為英超史上單季對同一支對手，最多入球紀錄，換言之紐卡素嘅「榮譽紀錄」，等於錫菲聯嘅「羞恥紀錄」。

錫菲聯已落後尾四諾定咸森林10分，剩下3輪肯定降級失敗，換言之僅升上英超1季，又要重返英冠。