不死身！利華古遜又喺補時續命　46場不敗

德甲冠軍利華古遜周日(28)再次展現「不死身」，主場對史特加喺補時6分鐘入波，一度落後兩球下以2比2逼和對手，全季不敗場數增加到46場。利華古遜連續第3場喺89分鐘之後入波力保不敗，相當神奇！

利華喺聯賽已經提前封王，今場喺下半場早段大意連失2球，最後半個鐘先如夢初醒，61分鐘由艾里接應傳中追番1球，去到補時6分鐘安特列治入波追平2比2。繼歐霸盃89分鐘逼和韋斯咸1比1、上場97分鐘迪和多蒙特1比1後，連續第3場絕地求生。

利華教練沙比阿朗素賽後表示：「我哋嘅終極目標係要贏晒所有冠軍，所以要繼續保持強勢唔可以停步，德甲仲有3輪，周中仲要喺歐霸盃對羅馬，我想用最好方法備戰呢場大戰。」