港超聯　米基爾半場「戴帽」：做好自己先

傑志周日（28日）於「中銀人壽香港超級聯賽」以6比0大勝香港U23後，繼續以3分落後理文，形勢被動，半場就大演帽子戲法的米基爾，坦承球隊要贏得聯賽冠軍，已無失分空間，呼籲隊友專注做好自己，盼最終反壓理文，奪得聯賽冠軍

「藍鳥」今場談笑用兵下，上半場已憑米基爾連入3球，連同祖連奴的「士哥」取得4球領先，加上迪美路夫及陳晉一下半場錦上添花，順利以6球差距勝出，米基爾賽後取走比賽用球留念外，並當選「全場最佳球員」（POM），他慶幸球隊在場地質素參差下，都能大勝一場：「可能呢幾日係咁落雨有影響，我哋開波前已見到塊草地好差，令兩隊唔可以從容組織，開頭仲踢得有啲辛苦，好彩大家調整踢法之後收到效果，順利贏波。」

米基爾目前在神射手爭奪戰中，與巴科爾等人鬥得激烈，他稱是役「戴帽」對其爭逐這項殊榮，有極大幫助，但強調聯賽冠軍才是重中之重：「依家球隊嘅形勢比較被動，所以大家唔好諗咁多，集中精神應付嚟緊幾場硬仗，希望最後攞到聯賽冠軍。」