麥湯米尼又受傷　或缺陣對水晶宮

曼聯上場英超唔只失分畀護級球隊般尼，仲有中場麥湯米尼受傷，領隊坦哈格透露，呢位蘇格蘭國腳嘅傷勢，令人擔憂，唔知能否出戰下場聯賽作客水晶宮。

麥湯米尼今場65分鐘後備上陣入替馬恩奧，但踢到補時受傷，由美臣蒙特入替佢。賽後主帥坦哈格被傳媒問到麥湯米尼傷勢，就話：「我仲未知道麥湯米尼情況，佢將會接受詳細檢查，睇下有乜問題，所以唔知道佢能否踢下場對水晶宮。」

麥湯米尼曾於4月初受傷，佢早前英足盃4強復出，並射入1球，協助曼聯打入決賽，呢位27歲中場今季為曼聯各項賽事上陣39場入10球，屬於紅魔鬼「主力射手」，如果佢缺陣，肯定削弱球隊攻力。

值得一提，曼聯前鋒海倫今場踢咗65分鐘又冇射門，僅觸球14次，最諷刺係門將奧拿拿今場4次傳波畀海倫，已經係全隊之冠，再次反映呢位丹麥國腳得唔到隊友支援，導致欠缺入波機會。