麦汤米尼又受伤　或缺阵对水晶宫

曼联上场英超唔只失分畀护级球队般尼，仲有中场麦汤米尼受伤，领队坦哈格透露，呢位苏格兰国脚嘅伤势，令人担忧，唔知能否出战下场联赛作客水晶宫。

麦汤米尼今场65分钟后备上阵入替马恩奥，但踢到补时受伤，由美臣蒙特入替佢。赛后主帅坦哈格被传媒问到麦汤米尼伤势，就话：“我仲未知道麦汤米尼情况，佢将会接受详细检查，睇下有乜问题，所以唔知道佢能否踢下场对水晶宫。”

麦汤米尼曾于4月初受伤，佢早前英足杯4强复出，并射入1球，协助曼联打入决赛，呢位27岁中场今季为曼联各项赛事上阵39场入10球，属于红魔鬼“主力射手”，如果佢缺阵，肯定削弱球队攻力。

值得一提，曼联前锋海伦今场踢咗65分钟又冇射门，仅触球14次，最讽刺系门将奥拿拿今场4次传波畀海伦，已经系全队之冠，再次反映呢位丹麦国脚得唔到队友支援，导致欠缺入波机会。