飛燕諾主將入場睇紅軍　施洛帶愛將加盟？

利物浦聘請飛燕諾教練施洛「好事近」，唔少新帥都會帶埋舊一齊轉會，已有利迷諗緊邊個飛燕諾球員啱心水。利物浦周六(27日)作客韋斯咸一仗，一名飛燕諾球員就自爆入場睇波，而且仲坐喺「紅軍」球迷區入面，引起外界無限揣測。

呢位突然成為利迷嘅飛燕諾球員，係23歲右閘基爾圖特亞，佢喺利物浦作客韋斯咸期間，喺社交網自貼身處現場睇波嘅相片，而且位置係客隊球迷區。喺施洛接近加盟利物浦嘅「風頭火勢」下，基爾圖特亞呢個舉動似乎有一定暗示。

基爾圖特亞係施洛愛將，今季31場聯賽全部正選上陣，並以右閘身份交出6個入波同4次助攻，上個月亦有份入選荷蘭國家隊，有望出戰夏天歐國盃決賽周。今年1月有傳拜仁慕尼黑想簽佢，當時轉會費約為3,000萬歐元。