飞燕诺主将入场睇红军　施洛带爱将加盟？

利物浦聘请飞燕诺教练施洛“好事近”，唔少新帅都会带埋旧一齐转会，已有利迷谂紧边个飞燕诺球员啱心水。利物浦周六(27日)作客韦斯咸一仗，一名飞燕诺球员就自爆入场睇波，而且仲坐喺“红军”球迷区入面，引起外界无限揣测。

呢位突然成为利迷嘅飞燕诺球员，系23岁右闸基尔图特亚，佢喺利物浦作客韦斯咸期间，喺社交网自贴身处现场睇波嘅相片，而且位置系客队球迷区。喺施洛接近加盟利物浦嘅“风头火势”下，基尔图特亚呢个举动似乎有一定暗示。

基尔图特亚系施洛爱将，今季31场联赛全部正选上阵，并以右闸身份交出6个入波同4次助攻，上个月亦有份入选荷兰国家队，有望出战夏天欧国杯决赛周。今年1月有传拜仁慕尼黑想签佢，当时转会费约为3,000万欧元。