巴黎聖日耳門提前封王　麥巴比爭3冠告別

巴黎聖日耳門(PSG)提前鎖定法甲冠軍！雖然PSG喺前一日聯賽失分，不過第2位嘅摩納哥周一(29日)凌晨作客2比3不敵里昂，喺只剩3輪聯賽下，領先12分嘅PSG得以宣告封王，亦係球會史上第12次法甲冠軍，為周中歐聯4強對多蒙特注下強心針。

摩納哥要贏里昂，先可以保住「數字上」奪冠希望，佢哋有賓耶達梅開二度，但里昂憑小將科芬拿「絕殺」反勝3比2，帶挈PSG提前3輪奪冠。近12季第10次奪冠後，PSG班主艾卡理化表示：「恭喜所有球員、安歷基同佢嘅團隊，由球季第1日我哋已團結一致，我好珍惜呢個時刻，而且會繼續努力，一場一場咁踢好，去到球季最後一刻。」

PSG最大捧盃功臣仍然係麥巴比，今季聯賽交出26個入波同7次助攻，盛傳佢將喺夏天轉投皇家馬德里，不過佢依家仍有機會為PSG實現「3冠王」作告別禮。PSG已殺入法足盃決賽(對里昂)，喺歐聯4強亦會同多蒙特爭逐決賽資格，首奪歐聯冠軍仍然係PSG嘅最大目標。