艾達臣左手受傷紮到實　情況唔樂觀

曼城喺爭標最後直路出現傷兵問題，門將艾達臣摩拉斯喺對森林一仗半場退下火線，原本以為只係預防性質，不過呢位巴西國腳賽後被影到左手要紮實，領隊哥迪奧拿承認艾達臣傷勢似乎好嚴重，冠軍衝刺隨時失去最強後盾。

艾達臣對森林表現失準，上半場幾次應付傳中都甩漏，其中一球更打唔中波撞向對手，未被判罰12碼算係執到，但佢喺呢次碰撞中亦左手受傷，治理後雖然頂埋上半場，但半場期間就被換走。完場後艾達臣被影到左手要用護具紮到實，哥迪奧拿賽後透露：「睇落艾達臣嘅傷勢情況唔樂觀，詳情要等軍醫檢查。」

慶幸嘅係，曼城2號門將史堤芬奧迪加今季表現出色，喺艾達臣季中受傷期間，31歲嘅奧迪加各項賽事有17場上陣紀錄，當中7場英超有5勝2和佳績，曼城似乎並冇受到太大影響。