阿巴謙破1年入球荒　羅馬逼和拿玻里

周一(29日)凌晨意甲，羅馬作客2比2逼和拿玻里，目前領先踢少1場嘅阿特蘭大2分排第5位，歐聯資格爭逐緊湊。今場羅馬搶分英雄係譚美阿巴謙，佢完場前2分鐘入救命波，打破長達1年嘅入球荒，呢位英格蘭前鋒形容再次入波感覺，好似「發夢」一樣。

羅馬今場59分鐘由保羅戴巴拿射入12碼領先，但拿玻里5分鐘後由馬泰斯奧利華拉追平，域陀奧森漢再喺84分鐘射入12碼反超前。以為羅馬將會痛失3分，後備上陣嘅譚美阿巴謙喺完場前2分鐘頭槌頂入，為羅馬追平2比2。

譚美阿巴謙之前因十字韌帶重傷缺陣多時，復出踢咗6場比賽終於入波，佢對上一個入球係上年4月30日，距離今個入波啱啱1年。譚美阿巴謙表示：「由球季開始我就夢想呢個時刻，經歷嚴重傷患，我要喺身心都做好準備，我等咗呢個入球好耐，好似發夢一樣，我會同隊友、家人慶祝，之後就準備下場賽事。」