阿積士新總監欽點　坦哈格有望回巢

曼聯領隊坦哈格帥位不穩，盛傳曼聯將喺夏天另覓新帥，不過坦哈格亦唔愁出路，據荷蘭傳媒爆料，阿積士新總監高爾斯將坦哈格視為頭號目標，希望佢回巢重建阿積士。

高爾斯喺3月份原本出任阿積士CEO，但上任後即爆出疑似就阿積士股票做內幕交易，結果被停職，提交證據後早前「降級」以總監身份加盟，而且負責物色新帥，代替季尾約滿嘅雲斯捷。荷蘭著名記者Marcel van der Kraan爆料，坦哈格係高爾斯最大目標，尤其曼聯好可能喺球季完結後將佢炒魷，阿積士將會即刻出手搶人。

高爾斯喺2000年成立嘅體育娛樂集團SEG，正正就係坦哈格囝囝任職分析師嘅公司，曼聯喺坦哈格上任後即建立密切關係，包括幫曼聯簽入海倫，季初就一度爆出涉及利益衝突嘅指控。高爾斯想將坦哈格帶返阿積士，似乎唔係空穴來風。