拿姆批評拜仁用錯甘美治　巴塞乘勢搶人

德國國腳甘美治今季喺拜仁慕尼黑改踢右閘，雖然仍係球隊骨幹，但光芒明顯被掩蓋，據報呢位29歲球星亦唔甘心「屈就」，唔排除夏天離隊。德國名將拿姆日前公開批評拜仁「用錯」甘美治，傳聞巴塞隆拿準備乘虛而入搶人。

甘美治係中場出身，不過今季被安排踢右閘，引起呢位德國國腳不滿。當年同樣以多才多藝見稱嘅拿姆就話：「一間球會點可以令自己嘅主將陷入呢個情況？我認為甘美治就係一個中場，雖然佢證明自己一樣勝任右閘，但踢中場先可以完全發揮佢嘅威力。」

據西班牙傳媒報道，日前宣布續教巴塞隆拿嘅沙維，視甘美治為夏天重點收購目標，佢同拜仁合約只剩1年，有望用3,500萬歐元嘅「低價」收購。除巴塞隆拿之外，英超車路士同法甲巴黎聖日耳門，據報亦對甘美治虎視眈眈。