K.O夏蘭特！魯迪格「心理戰」盯哈利卡尼

皇家馬德里喺歐聯大戰拜仁慕尼黑，中堅魯迪格肩負凍結哈利卡尼重任，呢位德國鐵衞喺8強兩回合搞到曼城前鋒艾寧夏蘭特「隱形」，今仗再遇頂級前鋒，魯迪格就講明會玩埋「心理戰」。

31歲嘅魯迪格今季成為皇馬後防核心，8強淘汰曼城唔單止凍結艾寧夏蘭特，仲喺互射12碼射入致勝球，信心爆棚，佢豪言面對頂尖前鋒會遇強愈強：「夏蘭特係隻野獸，佢天生就係入球機器，不過我就係為呢啲對決而生，當人哋睇死我嘅時候，我就會更加強大。」

魯迪格曾喺車路士效力5年，同哈利卡尼對戰過唔少次，佢喺賽前表示：「哈利卡尼同夏蘭特係同一種人，我好期待同佢對決。」魯迪格表示除咗係技術較量，心理戰亦係佢嘅殺着：「心理戰係比賽一部份，亦係我比賽嘅一部份，有時會順利，有時未必成功，但我會照樣咁做。」