【車路士官宣】堤亞高施華離隊　或無緣告別

車路士官網周一(29日)宣布，39歲巴西中堅堤亞高施華今季結束後離隊，結束4年藍軍生涯，效力期間佢為車路士贏得歐聯、歐超盃同世冠盃。

堤亞高施華於2020年8月由巴黎聖日耳門轉投車路士，4季上陣151場，入9球3助攻，單係今季就攻入4球，曾為球隊捧起歐聯冠軍，近兩季與球隊共同經歷動盪，被視為球隊精神領袖。

呢位巴西中堅坦言，當日加盟車路士時接近36歲，冇諗過為球隊效力咁長時間：「最初我只諗過喺度踢1年，但結果踢咗4年，我同家人已經成為球隊一部分。我一直全力以赴，呢個並非決定性結局，我希望不久將來會再返嚟，擔任另一個角色。」

會方宣布堤亞高施華離隊，可能再無機會上陣向球迷告別，《倫敦標準晚報》報道，上場對維拉佢因傷退下火線，嚟緊將接受腹股溝傷勢檢查，如確定受傷將提早收咧，無緣再落場作告別演出。