美斯認證　熱刺向盧施素加薪續約

熱刺阿根廷中場盧施素將於明年夏天約滿，巴塞同貝迪斯均有意斟介，美斯更曾親自向巴塞推薦呢位28歲同鄉，熱刺有見及此，打算對盧施素開出續約報價，仲有得加人工。

其實盧施素喺熱刺並非主力，今季僅上陣17場，僅得4場正選上陣，不過正所謂「瘦田冇人耕，耕開有人爭」，盧施素得到美斯親自認證，可見係好球員，成功引起領隊普斯迪高路注意，並將佢列入球隊計劃一部分。

《倫敦足球網》報道，熱刺打算向盧施素開出2年合約，薪酬仲會有一定增加，希望說服盧施素續約留隊。

至於盧施素亦無意重返西甲，仲話好鍾意熱刺：「領隊嘅訓練同執教方式令我感到好舒服，我好鍾意佢嘅足球理念，我相信可以喺佢球隊搵到位置。」