日本烏茲別克贏波晉級　U23亞洲盃上演夢幻決賽

今屆U23亞洲盃決賽隊伍誕生，日本U23、烏茲別克U23不約而同以2比0，分別擊敗伊拉克U23、印尼U23，攜手晉身決賽，兼獲得巴黎奧運入場券。日本、烏茲別克之前都贏過1次冠軍，今屆決賽無論邊隊勝出，都會成為賽事史上奪冠次數最多嘅球隊。

上屆亞軍烏茲別克U23今屆表現無懈可擊，由分組賽至8強，全部贏2球或以上，兼保持不失球，今仗4強亦唔例外，下半場由洛查耶夫入波打開紀錄，加上對手擺烏龍，再次淨贏2球，以完美姿態入決賽，力爭自2018年後，再次捧盃。

至於日本U23憑細谷真大、荒木遼太郎上半場各建一功，以2比0輕取伊拉克U23，繼2016年後再次入決賽，將於周五(5月3日)晚決賽同烏茲別克U23爭冠。

值得一提，U23亞洲盃史上，只有日本、烏茲別克、沙特地阿拉伯、南韓、伊拉克各贏1次冠軍，換言之，日本、烏茲別克踢完今屆決賽，將會出現首支2次奪冠球隊。

伊拉克U23同印尼U23踢季軍戰，爭奪一張直接晉身巴黎奧運入場券。