李斯特城捧英冠冠軍　一項紀錄超越曼城

周二(30日)凌晨英冠，榜首李斯特城憑老將占美華迪梅開二度，作客以3比0大勝普雷斯頓，提早一輪成為冠軍，亦係「狐狸兵團」史上第8次奪得英格蘭次級聯賽冠軍，正式超越曼城，成為次級聯賽史上捧盃次數最多嘅球隊。

賽前李斯特城已經肯定獲得前2位，下季直接升上英超，球員今仗仍然非常落力，全場有62%控球率，前鋒占美華迪上下半場各入1球，呢位37歲老將今季聯賽上陣34場入18球及2次助攻，仍然有心有力。加上22歲中場卡斯麥卡迪亞入波，贈普雷斯頓3蛋。李斯特城今季只剩下1場聯賽，領先踢少1場嘅葉士域治7分，提早一輪奪得冠軍。

不過，李斯特城之前被指控違反英超「盈利及可持續發展條例」，下季重返英超之後，面臨被罰扣分，可能要由「負分」起步。