莫耶斯將離隊　韋斯咸接觸兩大名帥

根據英國《衞報》爆料，韋斯咸領隊莫耶斯好大機會今夏離隊，會方亦開始物色新帥，並已經接觸兩位「冠軍級」名帥費歷克、盧比迪古，似乎對下季充滿野心。

據悉韋斯咸會方原本有意同莫耶斯續約2年，但其後球隊表現走下坡，現時排英超第8位，預料難以取得下屆歐洲賽入場券，所以管理層打算換帥，盛傳已經聯絡現時冇教職在身嘅前拜仁慕尼黑教練費歷克。

早前傳出巴塞隆拿有意聘請呢位59歲德國名帥執教，但後來成功說服沙維留隊，加上費歷克無意重返拜仁，令韋斯咸有機可乘。費歷克曾經率領拜仁慕尼黑捧德甲及歐聯冠軍，亦執教過德國國家隊，願唔願意「屈就」教韋斯咸，成為疑問。

因此，韋斯咸仲有另一位目標人選，就係盧比迪古，呢位57歲西班牙名帥曾經協助西維爾捧歐霸盃冠軍，之前教過狼隊，有英超經驗，原本AC米蘭計劃邀請盧比迪古領軍，但雙方傾唔掂數，韋斯咸把握機會接觸盧比迪古，或者可以令佢重返英超教波。