多蒙特又玩「老人防線」　想簽VVD

多蒙特一向簽人眼光獨到，除咗擅於發掘新星之外，亦有能力幫過氣球星搵到第二春，繼借用查頓辛祖，大翻身之後，又準備再向英超球員埋手。根據英國《鏡報》爆料，多蒙特有意羅致利物浦中堅華基爾雲迪積克(VVD)，接替另一位防線老將曉姆斯。

35歲嘅曉姆斯將於今夏約滿，但仍然未肯續約，以自由身離隊機會愈來愈大，會方有兩手準備，開始物色新中堅，華基爾雲迪積克成為目標人物之一。即將33歲嘅VVD效力利物浦6年以來，贏盡英超、英足盃、英聯盃、歐聯、世冠盃等錦標，已經無憾，盛傳因為「伯樂」領隊高普將於今夏離隊，呢位荷蘭國腳只剩下1年合約，亦有意走人。

事實上，華基爾雲迪積克年紀唔細，加上曾經受過重傷，身體難以長期應付英超激烈比賽節奏，開始考慮去其他聯賽搵食，引起西甲、意甲、德甲及土耳其球隊關注。以往英超球員加盟多蒙特，都有唔錯發展，包括前利物浦中場安利簡恩，多蒙特吸引VVD加盟可能有優勢。