PSG同18歲天才續約　接替麥巴比成新核心

巴黎聖日耳門(PSG)未能說服首席射手基利安麥巴比續約，但近日就成功用長約綁實中場新星沙利艾美利，雙方續約至2029年，會方將重點栽培呢位18歲法國國腳，將來接替麥巴比，擔任球隊核心角色。

沙利艾美利屬於巴黎聖日耳門青訓產品，16歲零151日就為球隊出戰聯賽，成為PSG史上正式賽事最年輕上陣球員，並迅速成為主力，上年11月已晉身法國大國腳，預料有望參加今屆歐國盃。雖然沙利艾美利位置上有別於基利安麥巴比，但兩人同屬天才型球員，PSG班主艾卡理化眼見留唔住麥巴比，於是改為將沙利艾美利打造成球隊新領袖，向佢開出長約。

沙利艾美利原本合約將於明夏約滿，佢續約之後話：「好開心可以留喺PSG，我自細已好愛呢間球會，希望作出最大貢獻。」相比起基利安麥巴比「貪婪」、「反骨」形象，沙利艾美利以乖乖仔示人，明顯更得人心，的確有潛質成為PSG新大佬。