拒絕拿玻里　加斯柏連尼續約阿特蘭大

阿特蘭大早前闖入意大利盃決賽，嚟緊又會喺歐霸盃4強火併馬賽，力爭雙料冠軍，咁好成績66歲老帥加斯柏連尼功不可沒，據報拿玻里打算挖角但已遭拒絕，加斯柏連尼將會同阿特蘭大續約。

加斯柏連尼執教阿特蘭大已經8年，期間未贏過任何錦標，19年同21年意大利盃決賽都輸波得亞軍，今屆意大利盃同歐霸盃雙冠齊齊「叫胡」，力爭開齋；意甲方面阿特蘭大現時排第6，僅落後第5嘅羅馬2分，仲有機會爭入前5取得歐聯資格，各條戰線都仲要搏命。

以阿特蘭大人腳打到咁好成績，加斯柏連尼已經交足功課，因此正在物色新帥嘅拿玻里，希望邀請呢位老帥過檔執教，但加斯柏連尼不為所動。

據報加斯柏連尼同阿特蘭大合約至明年夏天約滿，近日阿特蘭大準備同佢再續約1年至2026年夏天，到時如果教到約滿，加斯柏連尼執教阿特蘭大就會剛好10年。