患「恐仁症」　比寧咸成皇馬最大不利因素

皇馬中場祖迪比寧咸今季多次扮演「救世主」，喺比賽末段入波絕殺對手，但今場歐聯4強首回合對拜仁慕尼黑，唔止冇波入，仲踢到隱形，全場0射門。原來呢位20歲英格蘭國腳患有「恐仁症」，職業生涯9次對拜仁，未嘗一勝，只有2和7負，忽然成為皇馬爭取晉級決賽嘅最大不利因素。

根據統計，祖迪比寧咸今場觸球60次，只有1次關鍵傳球，而且0射門，最離譜有10次失去控球權。教練安察洛堤都忍無可忍，戰至75分鐘用老將莫迪歷入替祖迪比寧咸，明顯認為佢無法重演以往比賽末段入波絕殺好戲。

事實上，祖迪比寧咸近3場歐聯表現，都令人失望，其中8強兩回合對曼城，佢只有1次射門，而且唔中目標，同佢今季各項賽事上陣37場入21球嘅數據，判若兩人。

最大鑊係祖迪比寧咸被指患有「恐仁症」，皆因以前效力多蒙特期間，多次不敵拜仁，可能因而有心理陰影，導致再次遇上呢支宿敵，發揮受影響，難怪網民認為如果皇馬想打入歐聯決賽，次回合最好收起祖迪比寧咸。