卻奧斯演繹完美大腦　皇馬德國想捧盃要靠佢

皇馬可以喺歐聯4強首回合作客逼和拜仁慕尼黑2比2，雲尼斯奧斯祖利亞射入2球固然搶鏡，中場卻奧斯亦功不可沒，呢位34歲老將貢獻1次「手術刀式」妙傳助攻，交出一份攻守兼備完美成績表，「轉會權威」記者羅曼諾(Fabrizio Romano)都忍唔住，大讚：「卻奧斯等同真正足球。」

卻奧斯今仗雖然只踢咗76分鐘，但表現可圈可點，包括98次觸球、79次成功傳球、7次成功搶波、4次攔截、3次關鍵傳球、1次助攻，仲有1次精彩射門，僅被拜仁門將紐亞飛身撲出。

賽後皇馬教練安察洛堤大讚卻奧斯表現無與倫比：「實在無法用語言形容卻奧斯，佢係頂級球員，佢嘅傳送、把握時機等各方面，都對球隊非常重要。」卻奧斯將於今夏約滿，盛傳將續約1年，但至今仍未落實，相信經此一役後，會方應該會毫不猶豫向佢開出新約。

另外，卻奧斯相隔近3年，今年2月決定重新代表德國國家隊，拯救近年積弱嘅「日耳曼兵團」，出戰今屆歐國盃，無論皇馬或者德國，想捧盃都要靠呢位中場大腦。