般費大反擊　暗示今夏可能離開曼聯

早前傳出曼聯計劃今夏大清洗，只有3位新星海倫、馬恩奧、阿歷真度加拿祖屬於非賣品，換言之，隊長般奴費南迪斯都有可能被賣走，隨後呢位葡萄牙國腳被傳媒問到有關消息，佢話將於今屆歐國盃結束後決定前途，暗示唔排除會離開紅魔鬼。

般奴費南迪斯接受葡萄牙DAZN電台訪問，對於曼聯大清洗傳聞作出回應：「去留並非只取決於我，一位球員想留隊，但都要球會希望佢留低至得，我暫時未諗過離隊，如果一定要坦白講，總之歐國盃舉行前，我唔會考慮轉會問題，只會專注英足盃決賽及歐國盃賽事，現時冇嘢比呢兩項賽事重要，所以一切等歐國盃結束後再決定。」

換言之，般費認為要感受到曼聯仍然需要佢，先至會留隊，佢仲有2年合約在身，並承認曼聯今季表現未達到佢心目中水平。

今屆歐國盃將於6月14日至7月14日喺德國舉行，據悉曼聯新任行政總裁貝拉達將於7月正式上任，屆時可能會同般奴費南迪斯傾前途問題。