福仔撻着性感女模　夜蒲玩到腳軟

曼聯前鋒拉舒福特今季狀態持續低迷，但場外生活多姿多彩，根據英國《太陽報》爆料，呢位26歲射手近日同哥倫比亞性感女模兒Erica Correa喺曼徹斯特夜店消遣，似乎感情有着落。

拉舒福特上年夏天同青梅竹馬女友Lucia Loi分手之後，雖然曾經傳出上年11月復合，但最終都係冇下文。回復單身嘅「福仔」頻頻夜蒲，今年1月被影到連續2晚玩通宵，搞到連操練都去唔到，遭到曼聯內部懲處。

不過，拉舒福特仲未吸取教訓，近日又現身夜店，仲有美女相伴，目擊者指「福仔」同 Erica Correa喺夜店VIP區內玩樂，行為親暱。

據悉現場仲有多位女模特兒，但拉舒福特只係對Erica Correa有興趣。現年29歲嘅Erica Correa喺哥倫比亞出世，5歲時移居英國利物浦，網民將兩人封為「雙紅戀」。