34歲祖維迪翻生　要重溫10年前射爆維拉美夢

奧林比亞高斯打入今屆歐協聯4強，表現令人驚喜，呢支希臘球隊獲得佳績，上年夏天加盟嘅前鋒祖維迪功不可沒，呢位34歲老將效力過曼城，國際米蘭等球隊，佢曾於10前年英超射入阿士東維拉大門，奧林比亞高斯將於周五(3日)凌晨歐協聯4強首回合作客維拉，祖維迪要爭取入波，重溫昔日美夢。

祖維迪少年得志，19歲已登陸意甲，加盟費倫天拿，2013年夏天轉投豪門曼城，首季就協助「藍月亮」捧英超冠軍。祖維迪當年上陣機會較少，其中2014年5月英超主場對阿士東維拉，佢射入1球，幫曼城大勝4比0。

呢位黑山國腳效力「藍月亮」2季上陣44場入11球，就黯然離開，先後踢過國際米蘭、西維爾、摩納哥、哈化柏林，成為「球壇浪人」。

祖維迪上年夏天加盟奧林比亞高斯，獲得重生，今季上陣31場入7球，包括歐協聯16強及8強各有1球進帳，當中以16強次回合對特拉維夫馬卡比，加時入波最為關鍵，成為晉級大功臣。祖維迪大賽經驗豐富，今次遇上維拉，隨時又有神來之筆。