大衞拉耶將入選奧運名單　阿仙奴或拒絕放人

根據西班牙媒體《Relevo》爆料，阿仙奴門將大衞拉耶將會入選西班牙奧運男足初選名單，可能出戰7月底展開嘅賽事，影響為兵工廠備戰新球季，據悉阿仙奴有權拒絕放人。

西班牙自1992年後，未嘗再奪奧運男足金球，上屆獲得銀牌，領隊丹尼亞希望今屆強陣出擊爭金，包括動用3位23歲以上超齡球員名額，包括28歲嘅大衞拉耶。

根據賽程，巴黎奧運男足賽事將於7月24日展開，直至8月9日踢決賽，新一季英超將於8月17日開鑼，如果大衞拉耶為西班牙出戰奧運，意味將錯過阿仙奴季前備戰，加上踢完奧運需要休息，可能無緣季初賽事。

由於大衞拉耶屬於超齡球員，阿仙奴有權拒絕放人踢奧運，西班牙奧足主帥丹尼亞都無可奈何。