多蒙特救自己！德甲鎖定歐聯第5席

24/25球季歐聯進行大改革，今屆歐洲賽積分系數最高嘅兩個聯賽，將會額外獲得多1個歐聯參賽名額，繼意甲之前率先「中獎」後，多蒙特周四(2日)凌晨擊敗巴黎聖日耳門，令德甲落實拎「歐聯第5席」，「蜜蜂兵團」依家正正就係排德甲第5位，正式鎖定下屆歐聯資格。

多蒙特贏波後，德甲今季已有18.357分，就算阿士東維拉捧歐協聯、巴黎聖日耳門同馬賽捧歐聯同歐霸冠軍，英超同法甲都唔可能超越德甲，意味德甲同意甲一樣將有5個下屆歐聯席位。仲有一個情況係，如果多蒙特拎到歐聯冠軍，而喺聯賽最終排第5位(現時排名)，多蒙特會以衞冕身份參賽，而呢個額外名額就會畀德甲第6位球隊。

由於多蒙特已鎖定聯賽前5，即係佢哋肯定可以參加下屆歐聯，教練泰錫表示：「我哋冇諗過咁樣拎歐聯資格，但事實係德甲第5位都可以參加，而呢個情況有亦係有賴多蒙特嘅成功同貢獻。」