一人球隊？麥巴比死火　PSG兩年半未贏過

巴黎聖日耳門(PSG)喺歐聯4強首回合不敵多蒙特，稱霸歐洲美夢大受打擊，王牌球星基利安麥巴比今場表現令人失望，原來PSG喺麥巴比「死火」情況下，已經兩年半未試過喺歐聯贏波！

麥巴比今場擔任正箭頭，但威力唔及佢踢邊路大，全場7次過人只有2次成功，除下半場冇運射中柱之外，其餘時間表現普通。數據顯示自2021年11月開始，麥巴比只有9場歐聯冇波入，而PSG喺呢9場比賽只得3和6負成績，相反佢有入波嘅比賽，PSG就有11勝2和2負成績。

PSG教練安歷基賽後指出，把握力差係球隊今場輸波關鍵：「今場戰況緊湊，兩隊都做壓逼同爭取入波，大家都有好多入球機會，但我哋嘅埋門更差，埋門一腳欠缺冷靜，例如同一個攻勢入面2次中柱並唔常見，我哋要盡快學習同恢復，下場喺巴黎爭入決賽。」