迪姆華拿收咧　熱刺買斷「有保留」

熱刺要爭奪英超前4席位，衝刺階段再受打擊，1月份由RB萊比錫借用嘅迪姆華拿，因大腿受傷提早收咧，領隊普斯迪高路更表明對買斷呢位前鋒「有保留」，意味迪姆華拿未必有機會再留喺英超。

迪姆華拿借用期滿後，熱刺有權用1,500萬鎊轉會費將佢買斷，不過普斯迪高路就有所保留：「我哋會等球季完先決定，因為要考慮全盤策略，1月簽迪姆華拿因為佢係球隊呢半季嘅策略，我哋要考慮夏天有咩可以做？有咩需要做？亦有考慮迪姆華拿係咪符合我哋嘅策略。」

28歲嘅迪姆華拿喺2020至22年效力過車路士，今年1月重返英超表現唔差，14場聯賽交出2入波同3助攻，普斯迪高路亦多謝佢幫忙：「迪姆華拿喺我哋最缺人嘅時候加盟，孫興民踢亞洲盃、李察利臣又受傷，佢嘅加盟好幫到手，不過喺作出最終決定前，我要先清楚球隊嘅策略。」