阿仙奴將捷西斯掛牌　3替補人選曝光

阿仙奴球星夏維斯近況大勇，自季中由進攻中場改踢箭頭後，近11場聯賽入8球，夏維斯嘅爆發亦令原本前鋒加比爾捷西斯淪為後備。據《The Athletic》報道，阿仙奴已將加比爾捷西斯掛牌出售，並草擬收購名單，準備代替呢位巴西國腳。

捷西斯前季由曼城加盟後表現出色，但自22年世盃出現嚴重膝傷後，狀態同傷患一直反覆不定，今季英超只有4個入球，自從夏維斯霸佔前鋒位置後，捷西斯更加淪為大後備，2024年嘅13場聯賽，捷西斯只有2次正選，作為球隊最高薪球員之一，貢獻明顯唔合格，所以將被掛牌出售。

阿仙奴一直希望簽入新前鋒，1月份就傳過賓福特前鋒艾雲東尼，不過英國《每日鏡報》消息指，阿仙奴依家收購名單只有3人，包括紐卡素嘅阿歷山大伊沙克、RB萊比錫嘅施斯高同士砵亭嘅基奧基尼斯。