富咸中堅拒續約即入雪櫃　紐卡素搶人在望

富咸中堅艾達拉比奧約今季表現出色，獲得多間豪門賞識，據英國《每日郵報》報道，由於呢位26歲球星拒絕續約，已被領隊馬高施華打入冷宮，紐卡素有望喺夏天免費簽入呢位約滿球員。

曼城青訓出身嘅艾達拉比奧約有1米96身高，踢法剛柔並重，傳聞曼聯同熱刺都對佢虎視眈眈，不過《每日郵報》指紐卡素喺呢場爭奪戰中領先，佢哋因為財政問題，夏天會主打自由身球員，艾達拉比奧約就係主要目標，據報球隊已經率先展開接觸，有望先下手為強。

艾達拉比奧約同富咸合約季尾完結，佢最近再次拒絕續約後，上場聯賽對水晶宮突然被踢出大軍名單，領隊馬高施華證實佢並冇受傷，冇份踢係因為「富咸要為未來準備」，明顯係預咗艾達拉比奧約將會自由身離隊。