盧卡斯靴南迪斯重傷　歐聯、歐國盃夢碎！

巴黎聖日耳門(PSG)喺歐聯4強首回合輸波折將，對多蒙特一役傷出嘅法國國腳盧卡斯靴南迪斯，檢查後證實左膝十字韌帶撕裂，休養期長達6至7個月，唔單止冇辦法喺歐聯4強次回合生死戰候命，仲會錯過夏天嘅歐國盃決賽周。

28歲嘅盧卡斯靴南迪斯今季由拜仁慕尼黑加盟PSG，成為教練安歷基心目中必然正選，上場歐聯喺完半場前傷出，PSG隨後發聲明證實：「軍醫檢查發現佢左膝十字韌帶撕裂，MRI檢查已證實呢個診斷，盧南迪斯會喺未來幾日做手術。」據報呢位守將嘅養傷時間約6至7個月。

可以勝任中堅同左閘嘅靴南迪斯，一直係法國國家隊主力，健康情況下會係領隊迪甘斯嘅心水正選。法國目前中堅仍有唔少選擇，烏柏美卡奴、伊巴希馬干拿迪、威廉沙列巴同祖利斯古迪等都可以勝任，但左閘位置就人選唔多，傳聞盧卡斯迪治尼或費蘭特文迪會係代替人選。