曼城重點加強中場　柏基達成頭號獵物

曼城喺歐聯衞冕失敗，不過仍向英超、英足盃雙冠進發，領隊哥迪奧拿就覺得唔夠喉，準備夏天再用重金加強實力，重點想再提升中場水平，權威記者Fabrizio Romano證實盧卡斯柏基達係曼城頭號獵物，而且成事機會唔細。

曼城上年已簽入高華錫同馬菲奧斯紐尼斯，但哥迪奧拿想繼續添兵，Romano透露：「根據我依家嘅線報，曼城今夏增兵重點係中場，呢個係佢哋嘅計劃，曼城好鍾意韋斯咸嘅盧卡斯柏基達，不過佢並唔係曼城收購名單內唯一人選。」

巴西國腳盧卡斯柏基達今季表現出色，攻守兼備嘅踢法好適合曼城戰術，最重要係佢合約內有8,500萬鎊買斷條款，如果曼城「扑錘」出錢搶人，韋斯咸亦冇權Say No。柏基達早前被問到曼城斟介，呢位26歲中場就話：「場外發生好多事，但我只想專注今季，曼城收購嘅消息都係舊聞，我依家要踢好季尾，之後再睇下有咩事發生。」