被判爭議性12碼　盧頓又失分降班危機大增

周六(4日)凌晨英超下游大戰，盧頓主場出擊，因為被判罰爭議性12碼，最終只能逼和愛華頓1比1，繼續排尾三，降班危機愈來愈大。

賽前盧頓遭遇3連敗，今仗遇上實力接近嘅愛華頓，原本係搶分好機會，但上半場24分鐘遭到打擊，當時盧頓後衞文治防守角球期間，同對手班夫韋迪互相拉扯，最後班夫韋迪倒地，球證添羅賓遜睇完VAR之後，認為文治犯規，判罰12碼，卡維特利雲主射入網，為愛華頓打開紀錄。

盧頓失波後傾力反擊，僅過7分鐘就由伊利亞艾迪巴約射入扳平，之後攻勢一浪接一浪，包括盧克貝里頭槌攻門，僅被愛華頓門將比克福特飛身撲出，安祖斯唐辛射門僅斜出，最終打和1比1。

盧頓現時同尾四諾定咸森林同分，但踢多對方1場，餘下2場聯賽分別作客韋斯咸，主場對富咸，要搶分逃離降班區，並唔樂觀。