辛祖拒絕重返曼聯　多蒙特提出再借一季

查頓辛祖今年1月被曼聯外借去多蒙特後，獲得重生，並協助「蜜蜂兵團」打入歐聯4強，根據英國《太陽報》爆料，呢位24歲英格蘭翼鋒拒絕今夏借用期屆滿後重返曼聯，就算「仇人」坦哈格離開紅魔鬼，都唔會改變決定，所以多蒙特計劃向曼聯提出，再借用辛祖多一季。

查頓辛祖重返多蒙特後，表現如魚得水，上陣12場德甲入2球及1次助攻，上場歐聯4強首回合對巴黎聖日耳門，有12次成功扭過對手，成為自2008年美斯之後，近16年歐聯4強最高紀錄。查頓辛祖認為只有繼續效力多蒙特，事業先至可以重上顛峰，無論曼聯下季是否換帥，佢都冇打算回巢。

曼聯2021年夏天以7,300萬鎊(約7.16億港元)向多蒙特收購查頓辛祖，會方唔想割價出售佢，多蒙特財政上難以支付巨額轉會費回購辛祖，所以準備同紅魔鬼商討，下季繼續借用呢位翼鋒。由於曼聯計劃今夏大換血，估計唔介意繼續將查頓辛祖外借出去。