阿仙奴近8年第一人　大衞拉耶獲金手套獎

阿仙奴周六(4日)晚英超主場對般尼茅夫之前，收到好消息，門將大衞拉耶以14場「零封」對手，提早獲得今季英超金手套獎，亦係繼2015/16年球季施治之後，近8年首位獲此殊榮嘅兵工廠門將。

英超金手套獎頒畀每季聯賽最多場不失球門將，由於愛華頓門將比克福特周六(4日)凌晨對盧頓，失咗1球，今季英超維持12場「零封」，即使最後2場保持清白之身，都無法超越大衞拉耶，最多只能同呢位西班牙國腳共享金手套獎。阿仙奴仲有3場聯賽，大衞拉耶只要1場保持不失球，更加可以獨享金手套獎殊榮。

28歲嘅大衞拉耶上年夏由賓福特外借去阿仙奴，兵工廠有權今夏用2,700萬鎊(約2.65億港元)買斷佢，相信球季結束後就會正式完成交易。