列奧斯遭多蒙特放棄　或去沙特夥拍C朗

根據「轉會權威」記者羅曼諾(Fabrizio Romano)爆料，多蒙特已經決定唔同前鋒馬高列奧斯續約，意味呢位34歲德國國腳將於今夏約滿自由身離隊，結束12年「蜜蜂兵團」生涯。

馬高列奧斯對於未獲續約，感到遺憾：「我嘅人生有超過一半重要事情，都係效力多蒙特期間度過，非常感謝球迷對我嘅支持。」馬高列奧斯2012年夏天由慕遜加柏轉投多蒙特，至今為「蜜蜂兵團」上陣424場入168球，包括今季踢37場入7球。列奧斯曾經協助球隊捧過2次德國盃冠軍，並打入2012/13年歐聯決賽，但不敵拜仁慕尼黑。

馬高列奧斯年紀已大，近年亦經常受傷，加上多蒙特一直傾向重用年輕球員，上年已傳出會方打算放棄馬高列奧斯，佢今季失去隊長臂章，不獲續約並唔令人意外。盛傳沙特阿拉伯豪門艾納斯有意簽入馬高列奧斯，同C朗組成鋒線。