敵人嘅敵人係朋友　61%曼聯球迷支持阿仙奴捧英超

阿仙奴同曼城嘅英超爭霸戰進入大直路，英國媒體《SPORTbible》進行民意調查，訪問曼聯球迷想邊一隊奪得今季英超冠軍，結果有61%「魔迷」支持兵工廠奪冠，唔想同市宿敵曼城實現4連冠霸業。

今次民意調查有超過63,000人回覆，阿仙奴同曼城兩隊之中，有61%曼聯球迷寧願支持兵工廠奪冠，好大程度上唔想見到「藍月亮」成為英超史上首支4連冠球隊。

曼聯喺費格遜執教時期，曾經兩次成為英超3連冠，曼城過去3季都捧英超冠軍，如果今季都奪冠，就會超越紅魔鬼，成為史上首支4連霸球隊，曼聯球迷當然唔想呢一幕出現。

不過，亦有31%曼聯球迷支持曼城捧盃，有人話曼城奪冠太平常，第2日就被人忘記，反觀一旦阿仙奴捧盃，肯定會大肆吹虛，一直成為熱話，「魔迷」唔希望兵工廠長時間做主角。