點樣處置沙拿？高普咁回應

利物浦上場英超對韋斯咸，發生領隊高普同射手穆罕默德沙拿激烈爭吵一幕，令人懷疑兩人關係破裂。不過，紅軍周日(5日)晚出戰熱刺前夕，高普表示問題已經解決，大家互相尊重，關係仍然良好。

高普出席記者會期間，被問到同沙拿爭吵事件，佢話：「呢件事已經解決，冇晒問題，如果我哋認識冇耐，我就唔知點去解決，但我哋已經識咗好耐，大家互相尊重，簡單來講，如果球隊處於最佳狀態，贏好多比賽，入好多波，類似問題就唔會發生。」

至於穆罕默德沙拿會唔會復任正選對熱刺，高普就話：「餘下3場聯賽，你覺得我會一反常態，透露全部正選陣容咩？」沙拿近日操練時，笑容滿臉，相信已經同高普冰釋前嫌。