迪格蘭賴斯1傳1射　阿仙奴大炒般茅3粒

周六（4日）晚英超頭場，阿仙奴憑迪格蘭賴斯入波兼助攻，於主場以3比0輕取般尼茅夫，繼續排榜首保持爭標機會。

阿仙奴一開波即狂攻，令般茅門將麥克查華斯相當忙碌，先有夏維斯窄位抽射被救出，中堅威廉沙列巴意外地衝入禁區快射，又過唔到麥克查華斯，李安度杜沙特補射高出，湯馬士柏迪遠射亦被麥克查華斯撲出，阿仙奴攻勢一浪接一浪，夏維斯頭槌回傳，迪格蘭賴斯勁射僅僅斜出，去到上半場尾段，隊長馬田奧迪加特直線妙傳，夏維斯殺入禁區被麥克查華斯掃跌，球證直指12碼，布卡約沙卡一針見血。

易邊後阿仙奴未有鬆懈，麥克查華斯先後勇救布卡約沙卡同夏維斯嘅埋門，之後般茅反搶成功，跟住前鋒蘇蘭基勁射，輪到阿仙奴門神大衞拉耶化險為夷。去到70分鐘，迪格蘭賴斯一記轉身妙傳，李安度杜沙特第一時間射遠柱得手，之後迪格蘭賴斯窄位快射埋齋，最終阿仙奴豪贈般茅3蛋。