大哨出售高士路　净赚2.34亿

巴西名宿“大哨”朗拿度日前宣布，出售巴甲球队高士路90%股权，售予当地一名商人，据报呢笔交易令“大哨”两年间赚咗3,000万美元(约2.34亿港元)。

“大哨”挂靴后从商，担任西班牙球队华拉度列班主，2021年底买入当时仲喺巴乙嘅高士路90%股权，成为球队班主，当时买入价8,000万美元。

经营球队两年几之后，“大哨”决定卖盘，据报卖盘原因系球队成绩未如理想，球迷唔满意，令佢两面不讨好，近日有买家愿意以1.2亿美元收购佢手上90%股权，佢决定放手。

总计今次买卖，“大哨”用8,000万美元买入球队，期间对球队1,000万美元经费投入，球队由巴乙升上巴甲，两年多之后以1.2亿美元出售，盈利为3,000万美元。

据“大哨”喺IG留言指，新买家柏连奴系巴西第5大零售商，亦即高士路继续有大水喉射住，现时球队喺巴甲开季4战2胜1和1负排第7，开局顺利，而“大哨”卖盘后仍然留喺董事局，系球队一分子。