巴塞慘敗　皇馬提前奪西甲冠軍

皇家馬德里勇奪西甲冠軍！「1哥」皇馬周六(4日)主場3比0大破卡迪斯，由於巴塞隆拿之後2比4不敵基羅納，令皇馬喺只剩4輪聯賽下帶出13分，提早鎖定聯賽冠軍。今次係皇馬史上第36次西甲冠軍，追平祖雲達斯喺意甲奪冠次數，並列歐洲5大聯賽史上奪冠最多紀錄。

周中要踢歐聯4強次回合嘅皇馬，周六喺半力出擊之下，憑巴謙戴亞斯、祖迪比寧咸同祖斯奴喺下半場各建一功，主場輕鬆大勝3比0。周日(5日)凌晨登場嘅巴塞隆拿，作客基羅納輸波即告衞冕失敗，雖然佢哋靠安達斯基斯坦臣同羅拔利雲度夫斯基入波，半場領先2比1，點知換邊後防線崩潰連失3球，最終2比4輸波，帶挈皇馬提早封王。

得悉球隊提早奪冠後，皇馬教練安察洛堤接受球會官方電視台訪問表示：「非常開心！皇馬喺每一方面都完全值得贏冠軍，我哋好想同球迷一齊慶祝，但大家都知星期三有個好重要嘅挑戰(歐聯4強)，我哋要專心備戰，拎到令球迷開心嘅結果，下個星期再同球迷一齊慶祝西甲冠軍。」