拜仁輸波兼折將　歐聯對皇馬勢危

已失落德甲冠軍嘅拜仁慕尼黑，周六(4日)聯賽作客1比3輸畀史特加，唔單止聯賽次席隨時不保，更慘係拉菲爾古里路同艾歷迪亞都勇戰受傷，周中歐聯4強次回合作客皇家馬德里，形勢危危乎！

拜仁今仗半力出擊，點知17分鐘就有客串中場嘅拉菲爾古里路傷出，29分鐘就被史特加攻陷，雖然哈利卡尼完半場前為拜仁追平，但屋漏偏逢連夜雨，艾歷迪亞勇戰「爆缸」半場亦被換走。拜仁喺比賽尾段兩次犯錯，被史特加連入2球，最終作客1比3輸波。

拜仁教練杜曹賽後表示：「呢場敗仗完全係可以避免，我哋下半場有機會贏，但最後階段失去集中。我哋需要盡快收拾心情，因為未來4日先係最關鍵。」拜仁周四(9日)凌晨喺歐聯4強次回合作客皇馬，據報艾歷迪亞頭部傷勢並唔嚴重，應該可以候命，但拉菲爾古里路就比較麻煩，杜曹透露：「古里路要拎拐杖，情況令人心痛。」