真正剋星　薩斯索羅爆冷「雙殺」國米

周日(5日)凌晨意甲爆出6.2倍主W冷門，護級份子薩斯索羅主場以1比0擊敗已提早奪冠嘅國際米蘭，打破對方連續27場聯賽不敗之身。國米今季僅有2場敗仗，都係輸畀薩斯索羅，呢支「國米剋星」果然名不虛傳。

賽前排尾二嘅薩斯索羅之前6場聯賽未贏過，今仗亦處於下風，全場只有2次射門中目標，但都入到1球。當時上半場20分鐘，國米右閘杜費斯「送禮」，被對手祖殊杜治搶走腳下球，再傳中畀羅尼安迪射入。

國際米蘭原本有機會扳平，但拿達路馬天尼斯入波被判越位在先，加上阿拿奧杜域近門失機，注定無法打破宿命，自2023年4月對蒙沙之後，首次聯賽冇波入。

事實上，薩斯索羅一向有「國米剋星」之稱，雙方曾於意甲22次交鋒，薩斯索羅贏咗10次，成為薩軍喺意甲贏得最多嘅對手，其中2017/18年球季都試過「雙殺」國米，薩斯索羅今仗贏波可能唔算爆冷。