謝德謙：「利熱戰」邊隊可翻身？

今輪利物浦主場迎戰熱刺，上演英超前列大戰，雙方近況認真麻麻，「紅軍」連續兩場失分，逐步退出今季英超爭冠行列。而作客嘅熱刺聯賽亦吞3連敗，繼續排第5位，爭取出戰歐聯機會大減，雙方各有隱憂睇下，邊隊可以上演翻身戰呢？

利物浦上場作客以2比2打和韋斯咸，主帥高普將狀態低迷的沙拿、達雲紐尼斯放在後備席，雖然安德魯羅拔臣及加普均取得入球一度反先，但最終無法守到完場。高普除了解決同沙拿爭吵嘅內部矛盾之外，更要改善球隊攻防演出，近兩場都失兩球，「紅軍」今場面對熱刺大有失波嘅可能。

熱刺季尾進入魔鬼賽程，連續4場硬仗頭三場全敗，上場以0比2不敵車路士，主帥普斯迪高路在場邊大動肝火，賽後更表示球隊踢得差，表現連和波也不值，今場作客紅軍，相信普帥未必能及時改善球隊嘅防守表現，熱刺近期後防穿窿頻頻失波，估計今場都係倚重孫興民及李察利臣以攻代守。雙方近況低沉，估計會大打進攻足球，勢要上演翻身之戰。