錫菲聯失100球創英超紀錄　森林拎關鍵3分

英超護級形勢緊湊，諾定咸森林周六(4日)作客3比1擊敗錫菲聯，拎到護級寶貴3分，依家領先尾3嘅盧頓3分，而且得失球有11球優勢，形勢大好。至於肯定降班嘅錫菲聯，今季聯賽失球達到100球大關，成為英超史上單季失波最多球隊！

森林今場17分鐘先失，但憑住赫臣奧杜爾梅開二度，加上賴恩耶迪斯入波反勝3比1，森林領隊紐奴賽後表示：「保住優勢非常重要，護級命運依家掌握喺我哋手上，一定唔可以失敗，今場我哋向護級邁進一大步，但係戰鬥仲未完結。」

至於錫菲聯再失3球，今季英超失球達100球，追平93/94球季史雲頓嘅紀錄，但當年英超有22隊(踢42場)，而且錫菲聯仲有2輪聯賽未踢，「獨佔」史上最高失球紀錄機會極大。錫菲聯今季兩循環被紐卡素入13球，又被阿仙奴轟入11球，失波如同倒水。