港超聯　今季開齋　胡晉銘：攞冠軍做結婚禮物

榜首理文周日（5日）作客北區運動場出戰「中銀人壽香港超級聯賽」，最終以4球大勝均業北區，當中攻入今季「開齋波」的中場胡晉銘，笑言入球帶點幸運成份，他續指距離生涯首次奪得聯賽冠軍只差一步，希望以此作為自己的結婚禮物。

中場胡晉銘對北區表現出色，除在中場多次攔截外，更於73分鐘接應艾華頓傳中後上撞入，攻入今季「開齋波」，惟賽後他卻笑言入球有點幸運：「可能咁啱佢哋換完人，開始要進攻，令後面多咗空位，加上體能下降，自己都係咁啱出現，有啲好彩。」

理文擊敗北區後領先次席傑志6分，「晉銘」承認目前距離奪冠只差一步，希望將冠軍當作自己的結婚禮物：「其他球隊賽果都係參考，唔使咁多顧慮，只要搞掂埋下一場就可以。今季唔諗攞咩個人獎項，只希望攞到生涯第一個聯賽冠軍，下年1月結婚，都希望將佢做禮物。」